+7 (777) 001 44 99
Қазақша
Русский
English
09 июля 2020 | 13:08
"63 жасанды тыныс алу аппаратын аламыз". Блогер бес сағатта 12 миллион теңге жинады
Елімізде қайырымдылығымен танылған блогер Дәулет Төлеутайұлы бұл жолы коронавирус жұқтырғандарға көмектесуді қолға алды. Ол оқырмандарымен бірге жасанды тыныс алу аппараттарын сатып алу үшін 12 миллион теңгеден аса қаражат жинаған. Tengrinews.kz тілшісі Дәулет Төлеутайұлымен сөйлесіп, акция туралы сұрап білді.
ПОДЕЛИТЬСЯ
Елімізде қайырымдылығымен танылған блогер Дәулет Төлеутайұлы бұл жолы коронавирус жұқтырғандарға көмектесуді қолға алды. Ол оқырмандарымен бірге жасанды тыныс алу аппараттарын сатып алу үшін 12 миллион теңгеден аса қаражат жинаған. Tengrinews.kz тілшісі Дәулет Төлеутайұлымен сөйлесіп, акция туралы сұрап білді.
Дәулеттің айтуынша, ауырып жатқандарға жасанды тыныс алу аппаратына ақша жинау идеясын айтыскер ақын Айнұр Тұрсынбаевадан алған.
"Тұрсынбаеваның Instagram-парақшасынан "Қорымыз жасанды тыныс беру аппаратына ақша жинап жатыр" дегенді оқыдым. Соны оқып, Тұрсынбаеваға жаздым. Оқырмандарыммен бірге 50-ге жуық аппарат сатып алуға шамамыз жететін шығар деп айттым. Сөйтіп, байқап көрейік дедік. Кеше қаражат жинауды бастадық. 5 сағатта 12 миллион теңгедей ақша жиналды. Одан кейін де қорға ақша түсіп жатты. Сондықтан, басында хабарланғандай 50 емес, 63 аппарат алатын болдық", - деді блогер.
Дәулет Төлеутайұлы 63 аппаратты әр қалаға бөліп беретінін айтты. Оның айтуынша, қалаларды таңдағанда географиялық статусқа қараған. Қала статусы бойынша қай жерде адам саны көп болса, соларды таңдағанын айтады. Блогердің сөзінше, адам саны көп 50 қалаға бір аппараттан беріледі. Ал қалған 13-і аудандарға жіберіледі.
Жасанды тыныс беру аппараты. © Reuters
Блогер аппараттарды қаншаға сатып алғанын да айтты.
"Аппаратты доллармен сатып алып жатырмыз, сондықтан қате кетпеуі үшін сол валютамен түсіндірейін. Жасанды тыныс беру аппараттарын Түркиядан сатып алып жатырмыз. 63 аппарат үшін 35 500 доллар (14,5 миллион теңге - авт. еск.) төлейміз. Ақшаны бүгін аударғалы отырмыз. Мұнда банк комиссияларын қосып отырған жоқпыз. Бірақ біз медициналық салық, кеден салығын төлемейміз. Өйткені, елшілік көмектесуге уәде берді. Аппараттарды Қазақстанға жеткізу де тегін болады. Бір аппарат бізге шамамен 225-230 мың теңгеге шығып отыр", - деді ол.
Сондай-ақ, Дәулет көбірек аппарат алу керек еді деп пікір білдіргендерге де жауап берді.
"Бұл жерде айта кететін нәрсе бар. Кей адам тағы да жасанды тыныс беру аппаратын алайық деп жатыр. Айнұр Тұрсынбаева да қазір жан-жақтан аппарат іздеп жатыр. Өйткені, көп аппарат сатылып кеткен. Өзбекстан, Қырғызстанда 800-1000 данадан сатып алған екен. Ал елшілік бізге 100 аппаратты Түркиядан Қазақстанға тегін әкелуге көмектесті. Оның 63-ін "Дәулеттен" қоры, 37-сін "Айдың нұры" қоры сатып алып отыр", - дейді ол.
© Reuters
Блогер сатып алынған аппараттардың ауырғандарға көмектесе алады деген үмітте.
"Бір ай бұрын шілдеде вирус жұқтырып, ауырып жатқандарға көмектесеміз деп айтқанмын. Сол кезде жобаны "Екінші тыныс" деп атаған едік. Міне, бұл жоба атына заты сай болып тұр. Бұл аппараттар ауырған жандарға екінші тыныс сыйлайды деп үміттенеміз", - дейді Төлеутайұлы.
"Дәулеттен" қоры шілдеде "Екінші тыныс" жобасы бойынша жұмыс істесе, тамызда оқушыларға көмектеспек.
"Тамыздағы мақсатымыз - мектеп жасындағы балаларға көмектесу. Оларға мектепке қажетті құрал-жабдықты сатып әпереміз. Ал елдегі эпидмиологиялық жағдай тұрақтанбай, сабақтар карантинге байланысты онлайн өтеді деп жатса, ноутбук, планшет не ұялы телефон сыйлауды жоспарлап отырмыз. Алдын ала бәріне уәде бергім келмейді. "Арық сөйлеп, семіз шыққаны" дұрыс. Бәрін тамызда көре жатармыз", - дейді ол.
"Дәулеттен" қорының тағы бір бастамасы - халық арасында тегін дәрімен алмасу. Блогер бұл акцияға тұрғындар белсенді қатысып жатқанын айтады.
"Қорымыздың Instagram-парақшасында бір жоба бастадық. Акция мәні мынадай - сізде артық дәрі бар ма, "сторизге" саламыз. Кімге керек, сол алып кетеді. Маңыздысы қолдану мерзімі жарамды болуы, дәрінің аты толық көрінуі қажет. Негізгі шарт - ол сатылмай, тегін берілуі керек. Қазір тұрғындар дәрі-дәрмекті тегін ұсынып жатыр, біреу оттегі баллонын беремін деп жазды. Еліміздің түкпір-түкпірінен хаттар келіп жатыр", - дейді блогер.
Дәулет Төлеутайұлы осындай бастамаларымен елдегі қиын жағдайда вирус жұқтырғандарға көмектескісі келетінін мәлімдеді.
Показать комментарии
Читайте также
