COVID-19 жұқтырғандардың өсімі 7 пайыздан асқан өңірлер аталды

ҚР ДСМ Тауарлар мен көрсетілетін қызметтердің сапасы мен қауіпсіздігін бақылау комитетінің төрағасы Тимур Сұлтанғазиев еліміздегі бес облыста коронавирус індетін жұқтырғандардың өсімі 7 пайыздан асып тұрғанын айтты, деп хабарлайды Tengrinews.kz тілшісі.

Сұлтанғазиевтің айтуынша, еліміздегі көптеген облыста ауру жұқтырғандардың өсімі 7 пайыздан асып тұр. Маман ауру өсіміне байланысты аймақтардың үш топқа бөлінгенін атап өтті.

"Аймақтар бойынша коронавирус жағдайының тіркелуіне байланысты үш топқа бөлдік. Аурудың өсімі 7 пайыздан асқан аймақтар көп. Олар: Ақмола облысы, Ақтөбе облысы, Қостанай облысы, Түркістан облысы, Жамбыл облысы. Екінші топта COVID-19 бойынша ауру жағдайы 7 пайыздан төмен аймақтар. Бұл топта алты аймақ бар: Алматы облысы, Солтүстік Қазақстан облысы, Павлодар облысы, Қарағанды облысы, Алматы қаласы және Нұр-Сұлтан қаласы. Осы 7 күнде (11-17 мамырда) 553 жағдай тіркелді. Үшінші топта ауру өсімі 5 пайыздан төмен аймақтар бар. Бұлар: ШҚО, Қызылорда және Маңғыстау облыстары", - деді комитет төрағасы ДСМ медиаорталығында өткен онлайн-брифингте.

Сұлтанғазиев карантин шараларының жеңілдеуіне байланысты рейд бақылаулары күшейгенін атап өтті. 

Еске салайық, елімізде коронавирусқа байланысты енгізілген шектеулер біртіндеп алына бастады. 18 мамырдан бастап Алматы, Нұр-Сұлтан және бірқатар басқа қалада қандай нысандар жұмысын бастағаны айтылды.

Соңғы мәліметтер бойынша елімізде коронавирус жұқтырғандар саны 6 440 адамға жетті. Індет жұқтырған аурудан 3256 науқас жазылды, 32 науқас адам қайтыс болды.

Қазақстан жаңалықтары. Соңғы жаңалықтар. Telegram желісінде бізге жазыл!