+7 (777) 001 44 99
Қазақша
Русский
English
12 марта 2018 | 17:09
"Терезеден шығып үлгердік". Су тасқынынан зардап шеккен аягөздіктер апат жайлы
Шығыс Қазақстан облысы Аягөз ауданының орталығында болған су апатынан ондаған үй опырылды, - деп хабарлайды Тengrinews.kz тілшісі.
ПОДЕЛИТЬСЯ
Шығыс Қазақстан облысы Аягөз ауданының орталығында болған су апатынан ондаған үй опырылды, - деп хабарлайды Тengrinews.kz тілшісі.
Су тасқынынан үйі опырылған тұрғындардың бірі Әйгерім Жарылқапбергенова үйінің 10 минут ішінде қирап қалғанын айтады.
"Сағат бірдің шамасында судың ағысы күшейіп келе жатыр деді. Құжаттарды жинап, балаларымды алып шыққаным сол еді, лап берген судан есіктер ашылып кетті. Тауға шығып кеттік. Айналасы 10 минутта үй опырылып қалды. Біздің маңайымызда тағы 3 үй құлады, ал осы Жұмағазы Тоқсанғазин атындағы көшеде он шақты үй опырылып қалған. Қазір көршілеріміздің үйін паналап жүрміз", - дейді жергілікті тұрғын Әйгерім Жарылқапбергенова.
Жергілікті тұрғын Алмагүл Дүйсенова
"Үйде болғанбыз құжаттарымды жинап, енді шығайық дегенде мұз ағып кеп есікті бөгеп тастады. Терезеден шығып үлгердік. Осы Шәкенов көшесінде тағы бірнеше үй суда қалды. Комиссия келіп, акт толтырып кетті. Алтыншы мектепте орналастырып жатыр деп естідім, бірақ, көршілеріміздікінде жүрміз әзірге. Комиссия осында келіп құжат өткізіңдер деді. Енді қашан көмек болатынын күтіп жүрміз", - дейді Алмагүл Дүйсенова атты жергілікті тұрғын.
Апат салдарынан зардап шеккендер үшін Шоқан Уәлиханов атындағы мектеп-интернатында көмек орталығы құрылды. Бізбен байланысқа шығып, материал жинауға көмектескен Манар Жұмағазыұлы атты жергілікті тұрғын осы сәтте адамдарға гуманитарлық көмектің таратылып жатқанын хабарлады. Алайда мектеп ішін суретке түсіруге және зардап шеккендермен тілдесуге мектеп басшылығы рұқсат бермеген.
Шоқан Уәлиханов атындағы №6 мектеп-интернат
Кеше, 11 наурызда Аягөз қаласында су тасқыны болды. Тәулік ішінде құтқару қызметіне 1000 аса қоңырау шалынған. Су апаты салдарынан 11 наурызда Аягөз ауданы әкімінің жарлығымен жергілікті деңгейдегі Төтенше жағдай жарияланды. Ресми дерек бойынша, кеше 20 үйдің су астында қалғаны және 300 адамның қауіпсіз жерге көшірілгені хабарланды.
"Әріптестеріне көмек ретінде Өскеменнен 20 адамнан құрылған отряд, 5 техника және 3 жүзу құралы көмекке жөнелтілді", - делінген хабарламада.
Показать комментарии
Читайте также
