+7 (777) 001 44 99
Қазақша
Русский
English
05 декабря 2019 | 12:35
"Мен көрген Манчестер". Қазақ студенті ағылшындардың тіршілігін баяндады
Қазақстандық Айдос Ахметов Ұлыбританияның Манчестер қаласында оқып жатыр. Былтыр АҚШ-та оқып қайтқан, ал биыл Англияда тәлім алып жатыр. Айдос Tengrinews.kz тілшісіне берген сұхбатында ағылшындар арасындағы өмірі мен Манчестердегі футбол, жастардың белсенділігі туралы сөз қозғады.
ПОДЕЛИТЬСЯ
Қазақстандық Айдос Ахметов Ұлыбританияның Манчестер қаласында оқып жатыр. Былтыр АҚШ-та оқып қайтқан, ал биыл Англияда тәлім алып жатыр. Айдос Tengrinews.kz тілшісіне берген сұхбатында ағылшындар арасындағы өмірі мен Манчестердегі футбол, жастардың белсенділігі туралы сөз қозғады.
"Жарты миллион студент бар"Айдос Ахметов 1991 жылдың 22 желтоқсанында қарапайым отбасында туған. Айтуынша, Жетісай ауданы, Құрбан ата ауылында дүниеге келген.
Мұхит асып, АҚШ-та бір жыл оқып қайтқаннан кейін білімін шыңдау үшін Англияға жол тартқан.
"Англиядағы оқуға "Болашақ" бағдарламасы арқылы түстім. Қазір University of Manchester-де оқып жатырмын. Манчестерге келгенімде ағылшын тілі жағынан қиындық болмады. Себебі ағылшын тілін бұған дейін АҚШ-та үйренгенмін. Қазір "Инновациялық менеджмент және кәсіпкерлік" мамандығы бойынша "Мастер" дәрежесін алып жатырмын", - дейді ол.
Айдостың Манчестердегі оқуы 2020 жылы қыркүйекте аяқталады. Ол өзі үшін таңсық қалаға келгенде бірнеше дүние таңғалдырғанын айтады.
"Қатты таңғалдырған дүние - қаланың ескі болуы және барлық дерлік мекеменің сыртқы келбетінің қызғылт түсті болуы. Қазір жаңа биік ғимараттар салынып жатыр. Сонымен қатар, білім алып жатқан шетелдік студенттердің соншалықты көп екеніне таңданысым жоғары. Мысалы, 2017-2018 жылдың статистикасы бойынша, мұнда 500 мыңдай шетелдік студент білім алады. Шетелдік әр студент орта есеппен 15 000 фунт стерлинг төлесе, ел экономикасына біраз ақша құйылады", - дейді Ахметов.
Оның айтуынша, Англия жастары саяси өте белсенді.
"Олар өз мемлекеттеріндегі ғана емес, әлемде болып жатқан іс-әрекеттерге көзқарасын білдіріп, шеруге шықты. Өзім көрген жайтты айтайын. Сирия мен Түркия арасындағы болып жаткан қақтығыстан соң біздің университет территориясында күрдтерге қолдау көрсетілген шеру болды", - дейді Айдос.
Ол Манчестердің ауа райы ұнағанын айтады. Бірақ қалада оған ұнамаған нәрселер де бар екен.
"Ең қатты ұнағаны - ауа райы, жаңбыр жауады да тұрады, сол жаңбырда футбол ойнаған өте керемет сезім екен. Ал ең ұнамағаны - қалада баспанасыз қаңғыбастар көп екен. Жаңбыр жауғанда жағдайлары қалай болады екен деп жаның ашиды", - дейді ол.
Сөзінше, Манчестерде кеш ерте түседі.
"Ұнамайды демесем де, үйренісе алмай жүрген тағы бір жайт: түстен кейін 15:30-16:00 шамасында күн бата бастайды. Кешкі сағат бес-алтыда дала Қазақстандағы түнгі бір сияқты сезіледі. Соған әлі үйренісе алмай жүрмін", - дейді қазақстандық жігіт.
"Шайды басқа сусынға алмастырған"Әлемде ең шайқұмар халық ағылшындар деген ұғым бар. Бірақ Айдос Ахметов шайдың орнына басқа сусынды көбірек ішетінін айтады.
"Ағылшындар шайқұмар деген ұғымды естігенмін. Бірақ менің байқағаным, соңғы уақытта ағылшындар шайдан сыраға ауысқан сияқты. Себебі бәрінің қолында сыра. Бізде бір-бірін шайға шақырса, олар сыраға шақырады. Әр аптаның демалыс күндері қала орталығында шағын мереке секілді өтеді. Сондықтан, ағылшындарға қарағанда қазақтар көбірек шайқұмар деп ойлаймын", - дейді ол.
"Футбол болатын күн - Манчестерде мереке"Айдостың сөзінше, Манчестерде спортқа, әсіресе футболға көп көңіл бөлінеді. Футбол алаңдары өте көп, сондықтан қаланың кез келген түкпірінен оңай тауып алуға болады екен. Англияның футбол отаны екенін бірден сезуге болатынын айтады Ахметов.
"Футбол болатын күн манчестерліктер үшін мереке. Байқағаным - мұнда "Манчестер Юнайтедтің" жанкүйерлері өте көп. Себебі бұл клубтың тарихы тереңде жатыр. Соңғы уақытта "қызыл сойқандардың" нәтижелері көңіл көншітпей жүрсе де, жанкүйерлері мол. Ал "Манчестер Ситидің" жанкүйерлері - көбіне жастар мен шет елден келгендер. "Ситидің" қожайыны араб болғандықтан, Манчестердегі арабтардың көбі сол клубды қолдайды. Футбол болатын күні барлық кафе, мейрамхана ойынды тікелей эфирде көрсетеді. Футбол матчынан тыс уақытта екі клубтың жанкүйерлері арасында төбелес, жанжал деген болмайды. Олар тек спортта ғана бәсекелес", - дейді Айдос Ахметов.
Суреттер кейіпкердің жеке мұрағатынан
Показать комментарии
Читайте также
