Алматыда жаппай тәртіпсіздіктер кезінде 2300 адам ұсталған. Бұл туралы Полиция департаментінің басшысы Қанат Таймерденов мәлімдеді, - деп хабарлайды Tengrinews.kz тілшісі.
"Терроризмге қарсы операция басталғалы ішкі істер органдарына жалпы 2300 адам жеткізілді. Олардың 236-сы қарақшы және жаппай тәртіпсіздікке қатысқандар болды, олар қамауға алдынды. 84 адам комендаттық сағатты бұзғаны үшін әкімшілік жауапқа тартылды.
7 қару-жарақ дүкеніне шабуыл жасалғаны белгілі, онда 1347 қару ұрланған. Осыған байланысты арнайы тергеу тобын құрып, қабылданған шаралардың арқасында 127 қару тәркіленді. Оның 58-і аңшылық дүкеннен ұрланғаны анықталды. Сондай-ақ, 4000-ға жуық оқ-дәрі тәркіленді", - деді Қанат Таймерденов Алматы қалалық жедел штаб отырысында.
Қарақшылар 1600-ден аса сауда нысанын тонап, 356 көлікке зақым келгені де хабарланды.
"Барлығы 1097 қызметкер зардап шекті. Медициналық мекемеде жатқаны бесеу. Екеуінің жағдайы ауыр. 9 қызметкер қаза тапты.
Келтірілген залал алдын-ала есептеулер бойынша, полицияның 5 фронт-кеңсесі жанып кетті. Алмалы полиция бөлімі басқармасы ғимараты зардап шекті. 49 модульдік полиция бөлімінің 19-ы жанып кетті. 15 экологиялық полиция бекетінің 13-і жанып кетті. 165 көлік зақымдалды. Оның ішінде 64 көлік жөндеуге келмейді", - деді Алматы Полиция департаментінің басшысы.
Бұған дейін Алматы Полиция департаментінің басшысы Қанат Таймерденов қаладағы тәртіпсіздіктер кезінде 149 адам қаза тапқанын айтқан болатын.
Еске салайық, 1 қаңтарда Маңғыстау облысының Жаңаөзен қаласында бейбіт митинг болды, кейінірек ол тәртіпсіздіктерге ұласты. 5 қаңтарда тәртіпсіздіктер елдің 11 өңірінде жалғасты. Қатысушылар саны 50 мыңға жетті, қаңтардың 5-не қараған түні террористер Алматы қаласы әкімдігінің ғимаратын және "Алматы" халықаралық әуежайын басып алды.
Оқиғалар хронологиясы және құқықбұзушылықтарды тергеу туралы деректер жарияланды
6 қаңтарда Қауіпсіздік кеңесінің шешімімен елде антитеррористік операция өткізілетіні жарияланды. Осы күннен бастап құқық қорғау органдары мен Қарулы күштер террористерді жою үшін қару қолдана бастады.
8 қаңтарда жағдай біртіндеп тұрақтана бастады.
Сілтемесіз жаңалық оқисыз ба? Онда Telegram желісінде парақшамызға тіркеліңіз!
