Нұр-Сұлтан қаласы қоғамдық денсаулық сақтау басқармасының басшысы Сәуле Қисықова коронавирусты анықтауға мүмкіндік беретін экспресс-тест қалаға жеткізілгенін айтты, деп хабарлайды Tengrinews.kz тілшісі.
"Экспресс-тестілеу жұмыстарын жүргізу бас мемлекеттік санитар дәрігердің қаулысы бойынша эпидемиологиялық көрсеткішке сүйене отырып жүргізіледі. Экспресс-тестілеуден алдымен коронавирус инфекциясының таралмауына жол бермеу үшін күресіп жүрген мемлекеттік және мемлекеттік емес ұйымдардың қызметкерлері, медициналық-санитариялық ұйымдардағы адамдар және медициналық қызметкерлер өте алады. Бұл жұмыс бүгін басталады", - деді ол орталық коммуникациялар қызметінде өткен баспасөз қызметінде.
Айта кетейік, Қазақстанда коронавирус жұқтырғандардың саны 704-ке жетті. 51 науқас аурудан жазылды, 6 науқас қайтыс болды.
