"Мың бала шықса көп". Мамандар "Алтын белгі" сапасына күмәнмен қарайды

Камила Долаева Корреспондент

Фото: Tengrinews.kz/Тұрар Қазанғапов

Биыл елімізде 10 мыңға жуық түлек "Алтын белгі" алды. Мамандар медаль таратудан рекорд орнатқан мектептердегі білім сапасына күмән келтіріп отыр. Ал кейбірі тіпті бұл атаққұмарлыққа баулумен қатар, артық шығын деген ойда. Бұл туралы Aibаt жаңалықтар қызметінің сюжетінде айтылады.

Биыл елімізде 10 мыңға жуық түлек "Алтын белгі" алды. Мамандар медаль таратудан рекорд орнатқан мектептердегі білім сапасына күмән келтіріп отыр. Ал кейбірі тіпті бұл атаққұмарлыққа баулумен қатар, артық шығын деген ойда. Бұл туралы Aibаt жаңалықтар қызметінің сюжетінде айтылады.

Жаңа талап бойынша, "Алтын белгіге" үміткер ҰБТ тапсырып, жоғары балл жинауға міндетті емес. Себебі, медаль - мектеп емтиханын тапсырғаннан кейін беріледі. PhD доктор Аятжан Ахметжан "Алтын белгіні" оңды-солды тарату үрдіске айналғанына ашынады. Өйткені, кілең беске бітірген баланың білімі, сол медальға сай емес деген пікірде.

"Күллі Қазақстаннан мың бала шықса мен көп дер едім. Бірақ, өкінішке қарай, бізде 10 мың бала шығады. Он мың бала гений болса, біз дамыған елдер қатарына кіріп кетпей не істеп жүрміз?! Мектеп "пачкамен" таратады. Абырой, атақ үшін. Мектеп те, бала да, ата-ана да атаққұмар!" - дейді Нұр-Сұлтан қаласы 90 гимназияның директоры Аятжан Ахметжан.

Педагог сөзінің жаны бар. Себебі, жыл сайын медалист балалар көбейді. 2019 жылы төсбелгіні 7 349 оқушы, 2020 жылы 8 615 түлек иеленген. 2020-2021 оқу жылының қорытындысы бойынша 9 738 мектеп бітіруші "Алтын белгі" иегері атанды.

Қоғам белсендісі Дәулет Мұқаев оңды-солды төсбелгі тарату балаларды атаққұмарлыққа баулумен қатар, артық шығын, дейді.

"Бір медаль құны бюджетке шамамен 10 мың теңгеге түседі. 9738 медальға бюджеттен 97 000 000 теңгеден астам ақша кетті деген сөз. Бұл сөзімді осы кезге дейін "Алтын белгі" алғандар растайды. Бюджеттен кетіп жатқан 100 миллионға жуық ақшаны басқа нәрсеге жаратуға болады. Мектеп оқушыларына аттестаттағы "Алтын белгі" деген жазу жетеді", - дейді экономист, қоғам белсендісі Дәулет Мұқаев.

Жылдар бойы айтылып келе жатқан сын ескертпелер енді еленетін сияқты. Білім министрлігі, бұдан былай оқушылар 5-11-сынып арасында әр тоқсанды беске бітірмесе, "Алтын белгіні" бермейтінін айтып отыр.

"Ұлттық бірыңғай тестілеу кезінде дәлелдеп, кейін жоғары оқу орнына түскенде білімін көрсете алмай жатқан жағдайлар болып отыр шын мәнісінде. Осындай жағдайларды болдырмау үшін алдағы уақытта нақты "Алтын белгіге" иегер нақты оның иегері болуы керек", - дейді ҚР білім және ғылым министрінің орынбасары Шолпан Каринова.

Білім саласының мамандары үздік белгіге үміткерлер бөлек сыналуы керек екенін айтады. Сонда ғана шын мықтылар анықталады.