Тасымалдаушылар Алматы автобустарында SMS-төлемнің неге алып тасталғанын түсіндірді

Фотоколлаж © Tengrinews.kz

Алматыда қоғамдық көлік салондарындағы SMS-төлем туралы ақпараты бар жапсырмалар алып тасталды, - деп хабарлайды Tengrinews.kz тілшісі.

Алматыда қоғамдық көлік салондарындағы SMS-төлем туралы ақпараты бар жапсырмалар алып тасталды, - деп хабарлайды Tengrinews.kz тілшісі.

Жолаушылардың SMS-төлем туралы қойған сұрағына жүргізушілер ол жүйенің алып тасталғанын және енді SMS-төлемнің болмайтынын айтып жатты.

"Green Bus Company" ЖШС директорының орынбасары Бақытжан Рысбаевтың айтуынша, қоғамдық көліктердегі жапсырмалардың алынуына әкімдіктен жасалған ескерту себеп болған.

"Алматыдағы қоғамдық көліктер үшін SMS-төлем алынған жоқ. Көліктердің коды мен SMS жіберу нөмірі жазылған жапсырма қағаздар әкімдіктің ескертуінен кейін алынды. Қаладағы барлық қоғамдық көліктегі жапсырмалардың алынған себебі - олар бұрын терезелер мен есіктерге жапсырылған, алайда ереже бойынша ол жерлерге жапсыруға болмайды, енді олар қоғамдық көліктің терезелерінің жоғары жағына жапсырылады", - деді Рысбаев.

Оның айтуынша, алматылықтар енді жолақыны SMS арқылы бір аптадан кейін ғана төлей алады.

"Алматыда күніне орта есеппен 400 мың теңге жолақы SMS-төлем арқылы өтеді. Сондықтан SMS-төлем жүйеден алынбайды. Жапсырма қағаздарға тапсырыс қайта берілді, тапсырысты қабылдап алғандар жапсырмалардың бір аптада дайын болатынын айтқан, сондықтан мүмкіндігінше қайта іске қосуға тырысамыз", - деді ол.

Айта кетейік, Алматы қаласында қоғамдық көлікте жүру ақысы - 150 теңге, "Оңай" картасы бар жолаушыларға - 80 теңге, SMS-төлем де - 80 теңге.