21 февраля 2022 | 12:03

"Шымбұлақты шулаттық десек болады". Сноуборд пен шаңғы тепкен жас жұбайлар Қазнетті тәнті етті

Сымбат Сатыбалдина Журналист

Видео кадры. Tengrinews.kz коллажы

Шымбұлақта сноуборд пен шаңғы тепкен жас жұбайлар Қазнетті тәнті етті, - деп хабарлайды Tengrinews.kz тілшісі.

Желі қолданушылары жас жұбайлардың ерекше әрекетіне риза болған. Бүгінде видеоны 111 мыңнан аса адам көрген, 15,2 мың лайк басылып, 84 пікір жазылған. Видеода күйеу жігіт пен қалыңдық шаңғы мен сноуборд теуіп бара жатыр. Шымбұлақта жүрген бейтаныс адамдар оларды сыртынан түсіріп алған.

"Өте керемет, есте қаларлық", "Шымбұлақта танысқан-ау", "Керемет, мен де солай істегім келеді", - деп жазды TikTok қолданушылары.

@bknvkml Молодожены? #алматы #горы #шымбулак #ski ♬ Ты со мной - Lina Lee & Ваня Дмитриенко

Видеода тараздық Әлнұр және оның қалыңдығы. Олар биыл жазда шаңырақ құрмақ. Әлнұрдың айтуынша, бұл ешқандай әлеуметтік ролик емес. Видео Love Story үшін түсірілген екен.

"Біз Шымбұлаққа көтерілген кезде бәрі бізге қарай бастады. Келіп, құттықтап, суретке түсіп жатты. Сырттан видеоға да түсіріп жатты. Шымбұлақта өздеріңіз білетіндей, шетелдіктер көп жүреді. Польшадан келген әйел бізді көріп, қуанып, құттықтап жатты. Бізден "Бұл сонда сіздердің дәстүр ме?" деп сұрады. Шымбұлақты шулаттық десек болады. Бірақ ондай ой болған жоқ. Тек өзіміз үшін, естелік болсын деп бардық. Бұл Love Story-дің бірінші кезеңі. Кейінірек басқа да локацияларға барамыз", - дейді ол.

Сонымен қатар, Әлнұр таңдауы неліктен Шымбұлаққа түскенін айтты.

"Екеуіміз бір-бірімізді байланыстыратын нәрседен бастаймыз деп шештік. Мысалы мен бала күнімнен шаңғы тебемін. Сосын болашақ жарыммен кездесе бастағаннан кейін оған да үйрете бастадым. Оның таңдауы сноуборд болды. Біртіндеп үйрете бастадым. Өзім спорттың бұл түрін алып жүргеніме он жылдай, ал қалыңдығыма екі жылдай болды", - дейді ол.

Әлнұр мен жары. Сурет: жеке архив