+7 (777) 001 44 99
Қазақша
Русский
English
Қазақша
Русский
English
2000 жылғы Сидней Олимпиадасының чемпионы Ермахан Ибраимов қазақстандық боксшылардың биылғы Токио Олимпиадасындағы нәтижесіне баға берді, - деп хабарлайды Tengrinews.kz тілшісі.
Ибраимовтің айтуынша, қазір қазақстандық бокста дағдарыс басталған. Бірақ бұл қалыпты жағдай.
"Жұрт "қола дәуірі" деп жатыр. Қазақстан боксы ерте ме, кеш пе, осындай "қола дәуіріне" келер еді. Боксшыларымыз жанкүйерлерді алтын медальдармен қуантып, тек жеңіске үйретіп қойды. Бірақ мұндай дағдарыс бәрібір болады. Бұл сәт осы Олимпиадаға түсіп отыр. Оның бір себебі - пандемия. Жігіттер көптеген жарысқа шыға алмай қалды. Дұрыс дайындала алмады. Соның салдарынан боксшыларымыз "қоладан" аса алмады. Мұндай дағдарыс кез келген құраманың басынан өтеді", - деді Ибраимов.
Фото: Reuters
Сонымен қатар, Сидней Олимпиадасының чемпионы қазақстандық бокс мектебі Кеңес кезеңінде қалып қойған, сол үшін нәтижесі нашар деген пікірге қатысты ойын айтты.
"Ол пікірмен келіспеймін. Себебі Кеңес кезеңіндегі мектеп ең тиімдісі. Соның бір дәлелі - осы мектептен шыққан ресейлік Альберт Батырғазиев сапалы өнер көрсетті. Біздің боксшылар алдыңғы қолмен, аяқпен, қорғаныста жұдырықтасудың арқасында чемпион болып жүр. Бірақ биылғы Олимпиадада жігіттерден ондай бокс көрмедім", - деді ол.
Оның сөзінше, биылғы Олимпиадада төрелік әділ болған. Тек бір боксшымыздың жеңісі "ұрланыпты".
"Сәкен Бибосынов бірінші раундта жеңілді. Қалған екі раундта жеңіп шыққан еді. Сол ғана. Жалпы турнирді алғанда төрешілер әділетті болды", - деді Ермахан Ибраимов.
© Reuters
Боксшы бұл жағдайда кінәліні іздеу керегі жоғын айтады.
"Бұған кімді кінәлаймыз? Спортшыларды ма, бапкерлерді ме? Бұл Қазақстан боксының дағдарысы. Біреуді кінәлай салуға болмайды.
Жас боксшыларымыз бар. Олимпиададан кейін Василий Левит, Зәкір Сафиуллин секілді боксшыларымыз карьерасын аяқтайды. Олардың орнына жастар арасындағы кейінгі әлем чемпионатында "алтын" алған боксшылар келеді. Енді Ұлттық Олимпиада комитеті, Мәдениет және спорт министрлігі, әр облыстың бокс федерациялары жиналыс өткізеді, қай жерде қандай қате кеткенін талдап, кейін Париж Олимпиадасына дұрыстап дайындалуымыз керек. Кінәні біреуге ысыра салмауымыз қажет", - деп қорытындылады ол.
© Reuters
Еске салайық, Токио Олимпиадасында боксшыларымыз екі қола медальмен оралған болатын. Алғаш рет Қазақстан құрамасының боксшылары Олимпиада алтын жүлде еншілей алмады.
Сонымен қатар, бұл Олимпиадада жанкүйерлер үміт артқан көп боксшы жарыс жолынан ерте шығып қалған еді. "Қазақ салмағы" саналған 69 келіде Абылайхан Жүсіпов, әлем чемпионы Бекзад Нұрдәулетов пен Рио Олимпиадасының күміс жүлдегері Василий Левит 1/8 финалда жеңілген болатын.
