Бас санитар дәрігер коронавирус мамыр айында өрши түсетінін айтты 22 апреля 2020, 18:27
Қазақстанның бас санитар дәрігері Айжан Есмағамбетова елімізде коронавирус індеті өршу кезеңіне өткенін айтты, деп хабарлайды Tengrinews.kz тілшісі.
Бүгінде елімізде COVID-19 вирусын 2047 адам жұқтырған.
"Қазіргі таңда вирустық инфекциямен сырқаттанудың көбеюі аурудың өршуі болып саналады. Эпидемиологиялық тұрғыда аурудың өсу қарқыны маңызды. Себебі, ол эпидемияның нақты таралуын көрсетеді. Аурудың өсу дерегі 3 ай бойы байқалады. Ол - наурыз, сәуір, мамыр айлары", - деді ол орталық коммуникациялар қызметінде өткен баспасөз мәслихатында.
Айжан Есмағамбетова коронавирус індеті өршу кезеңіне өткенін атап өтті.
"Бүгінде біз аурудың өршу кезеңіндеміз. Мақсатымыз - аурудың қарқынын алдымен 5 пайызға, кейін 1 пайызға дейін азайту. Бүгінде аурудың қарқыны - 8 пайыз. Мамыр айында инфекция жоқ болып кетпейді. Ол бұдан кейін де тіркелуі мүмкін. Сондықтан профилактикалық шараларды тұрақты сақтау қажет", - деді бас санитар дәрігер.
Айта кетейік, Қазақстанда коронавирус жұқтырған 505 науқас аурудан жазылды, 19 адам қайтыс болды.