Ел тарихында алғаш рет әскери қызметшілерді запасқа шығару тоқтатылды - полковник

Азаматтарды әскерге шақыру төтенше жағдай режимі алынғаннан кейін қайта жүргізіледі және 31 тамызға дейін ұзартылады, деп хабарлайды Tengrinews.kz тілшісі.

ҚР ҚК БШ Ұйымдастыру-жұмылдыру жұмыстары департаментінің бастығы, полковник Сәкен Жүсіповтің айтуынша, 2019 жылы көктемде әскерге шақырылған әскери қызметшілерді запасқа шығару Төтенше жағдай режимі алынған жағдайда ағымдағы жылғы 30 маусымға дейін жүргізілетін болады.

"Әскери қызмет және әскери қызметшілердің мәртебесі туралы ҚР заңына сәйкес Қарулы күштердің жауынгерлік әзірлігін қолдау мақсатында Төтенше жағдай кезінде 2019 жылы көктемде әскерге шақырылған мерзімді қызметтегі әскери қызметшілерді запасқа шығару уақытша тоқтатылды. Запасқа шығарылғанға дейін осы әскери қызметшілерді киім-кешекпен, азық-түлікпен, қаржымен және медициналық қамтамасыз ету сақталады. Сонымен қатар, барлық өңірде әскерге шақыру және медициналық комиссиялардың жұмысы тоқтатылды. Осыған байланысты, Мемлекет басшысы азаматтарды мерзімді әскерге шақыру мерзімдерін 2020 жылғы маусымнан тамызға ауыстыру туралы жарлыққа қол қойды", - деді полковник ОКҚ онлайн-брифингінде.

Оның айтуынша, Жарлықта азаматтарды әскерге шақырудың бұдан бұрын бекітілген мерзімін биылғы маусымнан тамызға дейін ұзарту көзделеді. Азаматтарды әскерге шақыру төтенше жағдай режимі алынғаннан кейін қайта жүргізіледі және 31 тамызға дейін ұзартылады. 2019 жылы көктемде әскерге шақырылған әскери қызметшілерді запасқа шығару Төтенше жағдай режимі алынған жағдайда ағымдағы жылғы 30 маусымға дейін жүргізілетін болады. Бұл ретте әскери шақыру мен запасқа шығару қолданыстағы заңнамаға сәйкес іске асырылады, елеулі өзгеріс болмайды.

Бүгінде 9500 әскери қызметші патрульдеуді, дезинфекциялауды және басқа да міндеттерді іске асырып жатыр. Спикердің айтуынша, мұндай шешім ел тарихында алғаш рет болып отыр.

"Әскери қызметтің белгіленген мерзімін өткерген мерзімді қызмет әскери қызметшілерін запасқа шығаруды тоқтата тұру және азаматтарды әскерге шақыру мерзімін ауыстыру туралы шешім мемлекетіміздің тарихында алғаш рет қабылданып отыр және ол біздің азаматтарымыздың қауіпсіздігін қамтамасыз етуге бағытталған. Орын алған жағдайға түсініп қарауды сұраймыз", - деп түйіндеді сөзін Сәкен Жүсіпов.

Бүгін Мемлекет басшысы Қасым-Жомарт Тоқаев әскери міндеттілерді арнаулы жиындарға шақыру туралы жарлыққа өзгеріс енгізді.

Тоқаев қаулыға қол қойды: әскери міндеттілер арнаулы жиындарға шақырылады.

Еске салайық, Тоқаев әскери міндеттілер арнаулы жиындарға шақыру туралы жарлыққа 2 сәуірде қол қойған болатын. 

Қазақстан жаңалықтары. Соңғы жаңалықтар. Telegram желісінде бізге жазыл!