Қазақстандық вакцинаға қарағанда қытайлық екпені салдырғандар көп - маман 17 мая 2021, 13:29
Қазақстандыққа қарағанда қытайлық вакцинаны салдырғандар көп, - деп хабарлайды Tengrinews.kz тілшісі. Бұл туралы Алматы қалалық қоғамдық денсаулық басқармасы басшысы орынбасарының міндетін уақытша атқарушы Лаура Мырзағали онлайн-брифинг барысында мәлімдеді.
Лаура Мырзағалидің айтуынша, QazVac вакцинасына қарағанда елімізге қытайлық вакцина көп жеткізілген.
"Қазақстандыққа қарағанда қытайлық вакцинаны салдырғандардың көп болуы оны салдыруға ниеттенгендердің санына емес, жеткізілген санына байланысты. QazVac бізге 3 мың данада келді, ал Hayat-Vax - 15 мың. Сондықтан, оны салдырғандар көп", - деді Лаура Мырзағали.
Айта кетейік, бұған дейін Лаура Мырзағали созылмалы ауруы бар адамдарға да вакцина салуға болатынын айтқан еді.
Қазір Қазақстанда үш вакцина бар: "Спутник V", QazVac және Hayat-Vax. Соңғысы Қазақстанға мамыр айының басында келді. Оны жаппай егу 4 мамырда басталған.