+7 (777) 001 44 99
ПОДЕЛИТЬСЯ
Елбасы Нұрсұлтан Назарбаев Қабдеш Жұмаділовтің қайтыс болуына байланысты марқұмның отбасы мен туған-туыстарына көңіл айту жеделхатын жолдады, - деп хабарлайды Tengrinews.kz тілшісі Elbasy.kz сайтына сілтеме жасап.
Елбасы Нұрсұлтан Назарбаев Қабдеш Жұмаділовтің қайтыс болуына байланысты марқұмның отбасы мен туған-туыстарына көңіл айту жеделхатын жолдады, - деп хабарлайды Tengrinews.kz тілшісі Elbasy.kz сайтына сілтеме жасап.
Елбасы көрнекті қаламгер, Қазақстанның халық жазушысы, Мемлекеттік сыйлықтың лауреаты Қабдеш Жұмаділовтің өмірден өтуіне байланысты орны толмас ауыр қайғыға ортақтасып, көңіл айтты.
Қазақстанның Тұңғыш Президенті Қабдеш Жұмаділұлы қарымды шығармашылығымен, қажырлы қайраткерлігімен қазақ әдебиетінің дамуына қомақты үлес қосқан аса талантты тұлға болғанын атап өтті.
"Дарабоз дарын иесі өзінің мазмұны бай көптеген әңгімелері мен хикаяттары, кең тынысты эпикалық романдары арқылы ұлттық прозаның өсіп-өркендеуіне өлшеусіз еңбек сіңіріп, қилы замандарда түрлі теперіш көрген қазақ халқының талайлы тағдыры мен тарихын, аумалы-төкпелі тұтас дәуірдің келбетін қапысыз сомдады. Оның соңында қалған кесек туындылары - әдебиетіміздің алтын қорында сақталатын шын мәніндегі құнды рухани қазына.
Алаш жұртының қалтқысыз құрметіне бөленген абзал азаматтың есімі мен жарқын бейнесі жұртшылық жадынан ешқашан ұмытылмайды деп сенемін", - делінген жеделхатта.
Қазақстан Жазушылар одағының мүшесі Ақберен Елгезек Facebook желісіндегі парақшасында Қабдеш Жұмаділовтің жаназасы ертең, 6 сәуірде, сағат 10:00-де Алматы қаласы, Жамбыл көшесі 163-інші үйдің алдында өтетінін хабарлады.
"Марқұмның сүйегі өзінің аманаты бойынша Шығыс Қазақстан облысы, Үржар ауданы, "Бақты-Аягөз" тасжолының бойындағы бейітке қойылады", - деп жазды ол.
Еске салайық, бұған дейін Қазақстанның халық жазушысы Қабдеш Жұмаділов дүниеден озғаны хабарланған болатын. Мемлекет басшысы Қасым-Жомарт Тоқаев жазушының отбасына көңіл айтқан еді.
