Тоғжанов маңғыстаулықтарға үндеу жасап, комиссияның төрт шешімін жариялады 05 января 2022, 00:35
Қазақстан премьер-министрінің орынбасары Ералы Тоғжанов маңғыстаулықтарға үндеу жасады, - деп хабарлайды Tengrinews.kz тілшісі.
"Киелі Маңғыстау мекені мен үшін орны ерекше. Екі жылдан аса осы өңірде өздеріңізге қызмет ету бақыты бұйырған еді. Аймақ жұртшылығының еңбекқорлығы, ыстық ықыласы мен дархан пейіліне куәмін. Қазіргі таңда Президент тапсырмасымен құрылған үкіметтік комиссия өз жұмысын жалғастыруда. Өpдеріңізге белгілі, ҚР Президенті Қасым-Жомарт Тоқаевтың тапсырмасына сәйкес құрылған үкіметтік комиссия шешімімен бірқатар нақты шешімдер қабылдады және шұғыл түрде іске асырылды", - дейді Тоғжанов.
Осыдан кейін ол комиссия қабылдаған төрт шешімді атады:
"Біріншіден, сұйытылған газдың литрі 50 теңге болып бекітілді. Облыстың қалалары мен аудандарында газ құнының мөлшерін саралау "ҚазМұнайГаз" акционерлік қоғамының есебінен жүзеге асырылатын болады
Екіншіден, қазіргі уақытта біздің берген уәдемізге сәйкес, интернет ресурстары іске қосылды. Үшіншіден, құқық қорғау органдарының наразылық акцияларына қатысушыларды қудаламауы туралы сол жерде әңгіме болды. Ол және нақты қабылданған шешімге байланысты жүзеге асып жатыр. Төртіншіден, Қаражамбас кен қорының вахта жұмысшыларын Ақтау қаласына тасымалдау туралы осы комиссияға қатысқан азаматтардың нақты ұсыныстары болған. Ол да бүгінде нақты шешімін тапты. Сонымен қатар, өзге де әлеуметтік сұрақтар алдағы уақытта міндетті түрде қаралады. Ол мәселелердің шешімі Мемлекет басшысының тікелей қадағалауында", - деді үндеуінде Тоғжанов.
Сонымен қатар, премьер-министрдің орынбасары жұртты сабырға шақырды.
"Қадірлі бауырлар, сіздерді әр түрлі арандатуға және соның салдарынан болатын тәртіп бұзушылықтарға жол бермеуге шақырамын. Сабыр сақтап, тек қана ресми ақпараттарға сенулеріңізді сұраймын. Елдің бірлігі мен амандығы - біздің басты құндылығымыз екенін естеріңізге салғым келеді", - деді ол.
Еске салайық, Жаңаөзен мен Ақтаудың мыңдаған тұрғыны жаңа жылдан кейін бағасы күрт шарықтап кеткен сұйытылған газ бағасын түсіруді талап етіп, көшеге шыққан болатын. Олар жолдарды жауып тастаған.
Қазақстан Президенті Қасым-Жомарт Тоқаев үкіметке тиісті тапсырма берді. Өңірдегі жанар-жағармай құю бекеттерінің қожайындары өз бастамасымен газ литрін 120 теңгеден 85-90 теңгеге дейін арзандату туралы шешім шығарған. Кейінірек Қасым-Жомарт Тоқаевтың тапсырмасымен комиссия құрылған болатын. Бүгін үкіметтік комиссия мүшелері Маңғыстау мен Жаңаөзен белсенділерімен келіссөз жүргізіп, оның қорытындысы бойынша сұйытылған газ бағасы 50 теңгеге дейін төмендегені хабарланды.