+7 (777) 001 44 99
Қазақша
Русский
English
05 июля 2020 | 12:04
Музыкант қазақ күйін америкалық, араб және қытай мәнерінде орындады
Күйші, домбырашы, Aldaspan тобының мүшесі Мақсат Хасанов "Сарыжайлау" күйін қазақ, араб және америкалық стильде ойнады. Видеоролик оның арнайы Домбыра күніне орай ашылған YouTube-арнасында жарияланды, - деп хабарлайды Tengrinews.kz тілшісі.
ПОДЕЛИТЬСЯ
Күйші, домбырашы, Aldaspan тобының мүшесі Мақсат Хасанов "Сарыжайлау" күйін қазақ, араб және америкалық стильде ойнады. Видеоролик оның арнайы Домбыра күніне орай ашылған YouTube-арнасында жарияланды, - деп хабарлайды Tengrinews.kz тілшісі.
Төрт минуттық роликте өнерпаз Тәттімбеттің "Сарыжайлау" күйін түрлі мәнерде ойнайды.
Автордың айтуынша, бұл видеодағы оқиға әзілге құралған. Осылай ойнауының себебі домбыраны бүкіл әлем танып, дүние жүзінде адамдар ойнаса деген ой екен.
"Каналды арнайы Домбыра күніне орай аштым. Бұл каналда алдағы уақытта әлемдік хиттерді домбырамен, шаңқобызбен, дабылмен, кахонмен, ұрмалы аспаптармен және электрдомбырамен ойнаймын. Мұнда танымал әндердің кавер-нұсқасын ойнау да жоспарда бар. Мысалы YouTube-те "домбыра" деп терсең, видео өте көп. Бірақ ішінде кәсіби деңгейде жан-жақты, әртүрлі жанрда көрсететін канал жоқ. Сондықтан бұл каналым пайдалы болатын шығар деген оймен аштым", - дейді музыкант.
Өнерпаз домбыра тартуды 11 жасынан бастап үйренгенін айтты.
"Туып-өскен жерім - Түркістан қаласы. 5-сыныпта балалар саз мектебіне барғанмын. Домбыраны жай ғана үйрене салу бар, кәсіби деңгейде оқып бітіру бар. Бес жыл музыкалық мектепте, төрт жыл музыка колледжінде оқыдым. Тағы төрт жыл консерваторияда, екі жыл магистратурасын оқыдым. Осылайша домбыраның оқуына 15 жылымды арнадым. Сондықтан домбыраны жай ойнай салу бір бөлек, ал оны кәсіби деңгейде күйді зерттеп, дәстүрлі түрінде ойнап, әбден бойыңа сіңіріп, үлкен профессорлардың қолынан үйрену дұрыс деп ойлаймын", - дейді Хасанов.
Мақсат ұстаздары туралы да айтып берді.
"Ең бірінші ұстазым - марқұм Тұрдыбай Жұманұлы болды, колледжде Марат Анашев болды, ал консерваторияда Карима Сахарбайқызы ұстазым болды. Қарша Ахмедияровты, Айгүл Үлкенбаеваны, Біләл Ысқақовты, Абдулхамит Райымбергеновті ұстазым ретінде санаймын", - дейді ол.
Шетелде өтетін шараларға қатысып, домбыраның насихатын жүргізіп жүрген өнерпаздың айтуынша, ұлттық аспабымызға шетелдіктер қатты қызығады.
"Екі ғана ішегі болғандықтан шетелдіктер қатты қызығады. Қалайша осындай қарапайым аспаптан күрделі музыка ойнайсыңдар деп таңғалып жатады. Мысалы күй ойнасаң, оның құрылымын түсінбейді, композиторын сұрап жатады. Оны түсіндіру үшін домбыраның шыққан дәуірін, баяғыда өмірден өтіп кеткен ұлы тұлғаларымызды айтып, тарихын айтып бересің. Бұл күйлердің авторы үш-төрт ғасыр бұрын өмірден өткенін айтсаң, оған тағы таңғалады. Себебі еуропалық классикалық музыка орта ғасырдағы Бахтан басталса, біздікі одан да ерте, тереңірек", - дейді домбырашы.
Посмотреть эту публикацию в InstagramПубликация от Максат Хасанов (@maestro_maks) 9 Июн 2020 в 10:10 PDT
Музыкант Aldaspan тобының жоспарлары індетке байланысты әзірге тоқтап тұрғанын, алайда алдағы жылдары көптеген фестивальға қатысу, сол арқылы дәстүрлі аспапты насихаттау көзделіп отырғанын жеткізді.
"Нағыз қазақ - қазақ емес, нағыз қазақ - домбыра" деген ол қазақстандықтарды Домбыра күнімен құттықтады.
"Домбыра ұстаған қазақ болсын, домбыра ұстаған басқа ұлттың адамы болсын, барлығын шын жүректен құттықтаймын. Домбыра күнін енгізген Елбасымызға алғыс білдіремін. Бұрын домбыра Наурызда ғана керек боп қалатын, енді өзінің мереке күнін тауып, кең насихаты жүріп жатыр. Домбыра әр қазақтың үйінде ілініп тұруы керек, домбыра шертіп, әлемге жеткізсек, нағыз мереке сол деп ойлаймын. Бұл мереке соның бастауы. Сондықтан барлығыңызды шын жүректен мерекелеріңізбен құттықтаймын. Еліміз тыныш болсын, індеттен аман-есен құтылып, мәдениетіміз бен өнеріміз әрі қарай дами берсін!", - деді музыкант.
Айта кетейік, 2018 жылы Тұңғыш Президент Нұрсұлтан Назарбаев шілде айының бірінші жексенбісін Ұлттық домбыра күні деп белгілеу туралы қаулы қабылдады.
Сол кезде Елбасы "Домбыра - қазақтың жаны" деген пікірді айтқан.
"Күй, әуен мен домбыра үнін қырда өскен, мұрнында жусан иісі қалған қазақ қана түсінеді. Өйткені бұл ерекше музыка. Ол жан-күйіңді танытады: мұң, қуаныш немесе пәлсапаны. Кешкісін келіп, шерте бастағанда бәрі ұмтылып, есіңе өткен бір кездер оралады. Сондықтан бұл маған ұнайды. Домбыраны жақсы шерте білетін адамдар ұнайды. Қазақтың халық әндері өте әсерлі, пәлсапалық мазмұнда, күрделі. Қазақ әнінің сөзіне мән беру керек, әуеніне емес. Сөздің құдыреті бар", - деген еді Елбасы.
Показать комментарии
Читайте также
