1. Главная
  2. Узнай
  3. Жизнь
  4. Шоу-бизнес

Әнші Маржан Арапбаева тізгінде отырып Stories түсіргені үшін жазаланды

Фото: instagram.com/arapbayevamarzhan Фото: instagram.com/arapbayevamarzhan

Әнші Маржан Арапбаева тізгінде отырып Stories түсіргені үшін жазаланды. Ол қауіпсіздік белбеуін де тақпаған болып шықты, - деп хабарлайды Tengrinews.kz тілшісі. 

Тәртіп сақшылары әншінің ҚР әкімшілік құқық бұзушылық кодексінің екі бабы бойынша - 593 және 591-баптары бойынша жауапкершілікке тартылғанын хабарлады.

"Ағымдағы жылғы 22 шілдеде әлеуметтік желілерге мониторинг жүргізу барысында полиция қызметкерлері жол қозғалысы ережесін бұзу фактісін анықтады, атап айтқанда елорда тұрғыны қауіпсіздік белбеуін тақпастан көлік құралын жүргізген және көлік құралын басқару кезінде телефонды пайдаланған.
Полиция қызметкерлері құқық бұзушыны анықтап, ол ҚР ӘҚБтК 593-бабы және 591-бабы бойынша әкімшілік жауапкершілікке тартылды. Нұр-Сұлтан қаласы Полиция департаменті Жол қозғалысы ережесін және жылдамдық режимін қатаң сақтау қажеттілігі туралы жүргізушілерді ескертеді. Бұл жол қозғалысына қатысушылардың барлығы, яғни жүргізушінің өзі, сондай-ақ жолаушылары және жаяу жүргіншілер үшін өте маңызды", - деді Нұр-Сұлтан қаласы полиция өкілдері.

Әнші өз әрекетіне қатысты пікір білдірді.

"Бүгін таңертең айыппұлын төледім, заң бойынша. Заңға қарсы шықпаймыз. Мен өзімді ақтамаймын. Видео менің үйімнің жанындағы паркингте түсірілген. Бағдаршамнан енді өте бергенде сол видеоны түсіріп, бірден қауіпсіздік белдігін тақтым. Ол әрине ақталғаным емес. Бірақ солай болып қалды", - дейді әнші. 

Әншінің айтуынша, ол бүгін шамамен 18 мың теңгедей айыппұл төлеген. Яғни, көлікте қауіпсіздік белгісін тақпағаны үшін және ұялы телефон қолданғаны ұшін айыппұл тағайындалған. 

"Мінсіз көлік жүргізушісі болмайды ғой. Әрине, бұған дейін де ондай жағдайлар болды. Айыппұл төлемеген жүргізуші жоқ шығар. Бірақ күнде балаларым болсын, өзім болсын қауіпсіздік белдігін тағамын. Себебі қауіпсіздік бірінші орында. Бірақ сол күні қайырымдылық акциясына асығып бара жатқандықтан солай болып қалды. Біреу үшін емес, өзім үшін жауап беру керекпін", - дейді Маржан Арапбаева. 

Маржан Арапбаева өзінің бұл әрекеті басқаларға үлгі болса дейді. 

"Ол видеоның тарап кеткені дұрыс болды. Бұл жағдай басқаларға үлгі болды. Егер әр адам өзінің жасаған ісіне жауап берсе елде тәртіп орнайды деп ойлаймын. Барлығы ұсақ нәрседен басталады. Сондықтан бір шеті басқаларға тәрбие болады", - деп түсіндірді әнші.