Реклама +7(700) 388 81 09
  1. Главная
  2. Узнай
  3. Спорт
  4. Бокс

Жәнібек бокс тілімен айтқанда "мешоктармен" жұдырықтаспайды - боксшының өкілі 28 июня 2021, 15:12

АҚШ-тың бұрынғы әлем чемпионы Роб Брантты мерзімінен бұрын жеңген қазақстандық кәсіпқой боксшы Жәнібек Әлімханұлының менеджері Берік Сұлтан
  • ПОДЕЛИТЬСЯ
  • Vkontakte
  • Facebook
  • Twitter
  • Одноклассники
  • Telegram
Новостью поделились: человек
  • Нашли ошибку?

Жәнібек Әлімханұлы. Фото: instagram.com/janibek_qazaqstyle Жәнібек Әлімханұлы. Фото: instagram.com/janibek_qazaqstyle

АҚШ-тың бұрынғы әлем чемпионы Роб Брантты мерзімінен бұрын жеңген қазақстандық кәсіпқой боксшы Жәнібек Әлімханұлының менеджері Берік Сұлтан боксшының алдағы жоспарын айтты, - деп хабарлайды Tengrinews.kz тілшісі.

Берік Сұлтанның айтуынша, Жәнібек Әлімханұлы деген есім, Qazaq style деген сөз тек қазақ қоғамында емес, жалпы Америкада қызу талқыланып жатыр. Ал, жалпы Әлімханұлы биыл екі жекпе-жек өткізеді деп жоспарланған.

"Жәнібектің мықтылығын көпшілік бұған дейін де мойындайтын, алайда бұл жекпе-жек оны дәлелдей түсті. Сонымен қатар, бұл жекпе-жек Жәнібекті элиталы, жоғары деңгейлі боксшылар қатарына кіргізген жекпе-жек болды. Сол үшін де Жәнібектің жоспарлары дәл қазір америкалық спортшыларға, сарапшыларға, жанкүйерлерге өте қызық. Баспасөз беттері Жәнібек орта салмақтағы "қауіпті" боксшы болады деп, жоғары баға беріп жатыр. Жекпе-жекті сәтті өткізіп, бүгін Лос-Анджелеске ұшып келдік, 10 күн демалып, Жәнібек жаттығуға кіріседі. Келесі жекпе-жектің нақты уақыты белгісіз, алайда онкүндік демалыстан кейін келіссөздер басталады. Жоспар бойынша, биыл екі жекпе-жек өткізсек деген едік", - деді Берік Сұлтан.

Боксшының өкілінің айтуынша, Жәнібек Әлімханұлы үш чемпионмен жекпе-жекті асыға күтіп жүр.

"Жәнібек бокс тілімен айтқанда "мешоктармен" жұдырықтаспайды, бұрынғы жекпе-жектерінде де әлсіз қарсылас болған жоқ, бұл біздің команданың ұстанымы - әлсіз қарсыласқа жоламау. Себебі, мықты болу үшін мықтымен жұдырықтасу керек, сонда ғана келесі мықтыға жол ашылады. Жәнібек 72 келіде Чарломен, Деметриус Андрадемен және Муратамен жекпе-жек өткізуді асыға күтіп жүр. Осы үш чемпионға жекпе-жек өткізу туралы ұсыныс жасап жатырмыз. Әзірше олардың тарапынан жауап жоқ, бірақ мүмкіндігінше солармен ертерек кездесу өткізу негізгі мақсатымыз. Тіпті, биыл болса да дайынбыз", - деді Сұлтан.

Айта кетейік, Чарло Джермалл - орта және бірінші орта салмақта жұдырықтасатын америкалық кәсіпқой боксшы. WBC тұжырымы бойынша әлемнің қазіргі чемпионы (2019 жылдан бастап). Деметриус Андраде - америкалық жеңіліс көрмеген кәсіпқой боксшы WBO тұжырымымен қазіргі әлем чемпионы (2018 жылдан бері). Ал, Рёта Мурата - жапон кәсіпқой боксшысы, WBA тұжырымы бойынша әлемнің қазіргі суперчемпионы.

Берік Сұлтанның айтуына қарағанда, қазақстандық боксшы Лас-Вегасқа жекпе-жекке барғанында бокс мамандары мен журналистер Роб Брант мықты, чемпион болған, Жәнібектің кәсіпқой бокстағы тәжірибесі жетер ме екен, дайынсыңдар ма деп күдіктенген. Алайда, Жәнібек "жекпе-жекті мерзімінен бұрын аяқтаймыз" деп сұхбат берген кезде бәрі таңғалыпты. Ал жекпе-жектен кейін сол басылымдардың бәрі өзгеше пікір жазып, мақала жариялапты.

"Роб Брант Qazaq style-ге қиындық тудыратын боксшы болмады. Кеше промоутеріміз Боб Арум "осы жекпе-жектің жеңімпазы WBO тұжырымы бойынша міндетті қарсылас атануға жұдырықтасады енді" деді. Қазір WBO рейтингінде бірінші орында Мунгия (Хайме Мунгия - мексикалық кәсіпқой боксшы - Авт.) тұр, ол өте мықты, азулы қарсылас. Мүмкін осы жекпе-жектің жеңімпазы мен Мунгияның кездесуін ақылдасамыз делінді. Демек, Арумның сөзіне қарағанда, сол Мунгия мен Жәнібек WBO чемпионымен жұдырықтасуға міндетті қарсылас атану үшін жекпе-жек өткізеді, қай жеңгені WBO чемпионы Деметриус Андрадемен кездеседі", - деді ол.

Сұлтанның айтуынша, Мунгия мен Жәнібектің жекпе-жегін ұйымдастыру - промоутердің жоспары. Ал, боксшы чемпиондық үшін жекпе-жекті биыл өткізуге ниетті.

"Біз бұдан да жақсы, бұдан да жылдамырақ жолдарын қарастырамыз. Себебі, келіссөздер бар, егер ол жақ тарап келіспейтін болса біз чемпиондық титул үшін тезірек жекпе-жек өткізу жолдарын іздейміз. Чемпиондық үшін жекпе-жекті биыл өткізуге тырысамыз, дайынбыз, біздің қолда болса бұл жекпе-жекті кеше өткізіп, чемпион атанып қояр едік", - деді Әлімханұлының өкілі.

Еске салайық, Жәнібек Әлімханұлы өткен демалыста Лас-Вегастағы бокс кеші аясында бұрынғы әлем чемпионы америкалық Роб Брантты жеңген болатын. Алтыншы раундта ол қарсыласын нокдаунға түсіріп, сегізінші раундта Бранттың бұрышындағылар жекпе-жекті жалғастырудан бас тартты. Осылайша, Әлімханұлы орта салмақтағы үздік 10 боксшының қатарына енді.

Жекпе-жектен кейін сұхбат берген Жәнібек Әлімханұлы қазақ стилі қандай екенін әлемге көрсеткенін мәлімдеген болатын.

Подпишись на почтовую рассылку Tengrinews.kz. Получай все самое главное за неделю каждую пятницу на свой адрес.


Join Telegram