Ішкі істер министрінің орынбасары Юрий Ильин қатты желден Қазақстанда қанша ғимаратқа зақым келгенін айтты, деп хабарлайды Tengrinews.kz тілшісі.
Оның айтуынша, 6-8 сәуірде жылдамдығы секундына 30 метрге жететін қатты жел Қостанай, Ақмола, Солтүстік Қазақстан облыстарында соққан.
"Салдарынан бұл жерлер жарықсыз қалды. Әртүрлі ғимараттардың шатыры ұшты. Осы уақытта 3 өңірде 395 нысанға зақым келді: Ақмола облысында 210 нысан, Қостанай облысында 92 нысан, Солтүстік Қазақстан облысы 93 нысан. Бұл - әкімшілік, тұрғын-үй ғимараттары", - деді ол орталық коммуникациялар қызметінде өткен брифингте.
Оның айтуынша, қатты желден 2 адам зардап шеккен. Олар Солтүстік Қазақстан облысында. Олардың өміріне қауіп төніп тұрған жоқ.
Сондай-ақ, вице-министр солтүстіктегі 3 өңірге қашан жарық берілетінін айтты
"Бүгін Қостанай, Ақмола, Солтүстік Қазақстан облыстарында жарықты қалпына келтіру жұмыстары аяқталуы керек. Кешкі сағат 18:00-де барлық елді мекен жарықмен қамтамасыз етіледі", - деді Юрий Ильин.
Айта кетейік, бұған дейін Қазақстанның 3 қаласы сусыз, жылусыз және жарықсыз қалғаны хабарланған. Қостанай, Рудный, Лисаковск қалаларында электр беретін құрылғылар мен ағаштар, билбордтар мен ғимараттардың қаптамасы қираған.
