16 июня 2021 | 09:10

Израиль коронавирусты қалай жеңді? Хайфада тұратын қазақстандықтың әңгімесі

Есет Тулеш

Фото: Reuters

Таяуда Израиль коронавирусты жеңгенін мәлімдеді. Маусым басында бұл елде карантин шектеулері алып тасталды. Израильдің Денсаулық сақтау министрлігі шектеулер коронавирус жұқтырғандар саны азайғанына байланысты алынғанын хабарлаған. Tengrinews.kz тілшісі Израильдегі эпидемиялық жағдай туралы баяндайды.

Таяуда Израиль коронавирусты жеңгенін мәлімдеді. Маусым басында бұл елде карантин шектеулері алып тасталды. Израильдің Денсаулық сақтау министрлігі шектеулер коронавирус жұқтырғандар саны азайғанына байланысты алынғанын хабарлаған. Tengrinews.kz тілшісі Израильдегі эпидемиялық жағдай туралы баяндайды.

"Коронавирусты жеңген алғашқы ел"

Израильде жаппай вакцинация биыл қаңтарда басталған. Мемлекет бұл үшін америкалық Pfizer вакцинасын сатып алған. Халыққа жақын маңнан вакцина алуға болатын жерлер айтылған SMS-хабарламалар жіберген.

Нәтижесінде халықтың басым бөлігіне вакцина салынған. Ал елдің сол кездегі премьер-министрі Биньямин Нетаньяху Израиль COVID-19-ды жеңген алғашқы ел екенін айтқан болатын.

Фото: Reuters

1 маусымнан бастап Израильде карантин жеңілдеді. Қоғамдық және ойын-сауық мекемелерінің жұмысына қойылған шектеулер алынып тасталды. Яғни, дүкен не мейрамханаға барғанда, енді коронавирусқа қарсы вакцинаны растайтын құжат сұрамайды.

"Алты айдан аз уақыт бұрын біз вакцинацияны бастадық. Денсаулық сақтау жүйесінің керемет жұмысы арқасында біз әлем бойынша ең үздік вакцинация науқанын өткіздік. Елде вирус жұқтырудың төмен деңгейі тіркеліп, соның жемісін көріп жатырмыз", - деді денсаулық сақтау министрі Юлий Эдельштейн.

Фото: Reuters

Бүгінде Израильде коронавирус жұқтырып жатқандар бар. Бірақ ол аз. Кейінгі бір аптада күн сайын орта есеппен 15 адамнан COVID-19 анықталады.

Ересек топтың 76 пайызы вакцинаның екі дозасын салдырған

Қазақстандық Динара Әлібекова қазір Израильдің Хайфа қаласында тұрып жатыр. Динара негізі Жамбыл облысы онкологиялық диспансерінде онколог-маммолог болып жұмыс істейді. Былтыр арнайы грант иегері атанып, 2020 жылы желтоқсанда Израильге аттанған. Бүгінде Рамбам медициналық орталығында тәжірибе алып жатыр.

"Мен Израильге былтыр желтоқсанда келдім. Ол кезде қатаң карантин болған. 14 күн карантинде жаттым, ПТР-сынаманың теріс нәтижесі көрсетілген анықтама көрсетуге міндетті болдық. Кейін екінші рет сынама тапсырған соң, тәжірибеден өте беруге рұқсат етілді. Бұл кезеңде шектеу шаралары қатаң болды. Көшеде ешкім жүрмейтін. Үйден бір шақырым жерге ғана шығуға рұқсат етілді. Дүкенге де жалғыз баруың керек, екі адаммен жүруге тыйым салынды", - дейді Динара.

Динара Әлібекова

Оның айтуынша, қазір елдегі жағдай сол жарты жыл бұрынғымен салыстырғанда айтарлықтай өзгерген.

"Қазір Израильдегі эпидемиялық жағдай тұрақты. Яғни, күнде коронавирус жұқтырғандар анықталып жатыр, бірақ өте аз. Мұның бірнеше себебі бар. Біріншіден, Израильде жақсы тәртіп орнатылған. Екіншіден, әрине, вакцинация. Оның үстіне, елде медициналық қызмет көрсету деңгейі жоғары", - дейді Динара.

Фото: Reuters

Оның айтуынша, елде коронавирус жағдайы тұрақталып, карантин шектеулерін алуға вакцинация себеп. 11 маусымдағы жағдай бойынша, Израильде 16 жастан асқан ересек топтың 76 пайызы вакцинаның екі дозасын салдырып үлгерген.

"Вакцинация басталған кезде, бірінші кезекте, қарт тұрғындарға екпе салынды. Кейін дәрігерлер екпе алды. Бұлар осал топтар қатарына кіреді. Қазақстандағы вакцинация жұмысымен салыстырғанда - мұнда екпе салдырғандар саны өте көп. Израильде ақпараттық саясат жақсы қолданылады. Профессорлар, танымал қайраткерлер күн сайын ақпарат беріп отырады. Олар халықты вакцина салдыруға шақырады", - дейді ол.

Фото: Reuters

Динараның айтуынша, Израиль халқының дәрігерлерге сенімі мол. Көбі вакцина салдыру үшін арнайы іздеп барады екен.

"Антиваксерлер (вакцинаға қарсы адамдар - еск.) барлық жерде бар шығар. Бірақ Израильде ондайларды көрмедім. Керісінше, бәрі қайда барып вакцина салдыруға болатынын сұрап жатады. Мен медицина саласында жұмыс істесем де, коронавирусқа, вакцинаға тікелей қатысым жоқ. Мен - онкологпын. Бірақ онкологиялық қабылдау кезінде де науқастардың көбі химиятерапия немесе емделу барысында қашан вакцина салдыруға болатынын сұрап жатады. Бәрі де вакцина салдырғысы келеді", - дейді ол.

Израильде 1 маусымнан бері сақталған талап - ғимарат ішінде маска тағу болатын. Ал кеше елде бұл талап та алынды. Сейсенбіден бастап маскаларды дүкендерде, жұмыс орындарында, мәдени мекемелерде, ойын-сауық орталықтарында тағу міндетті емес. Тек аурухана қызметкерлері мен науқастар, қарттар үйінің қызметкерлері, ұшақта отырған жолаушылар маска тағуға әлі де міндетті.

Вакцина Вакцинация Коронавирус COVID-19 Израиль

Вопрос от автора

Что вы об этом думаете?