1. Главная
  2. Узнай
  3. Новости
  4. Новости мира

Оңтүстік Кореяда коронавирусқа байланысты жағдай өршіп тұрғаны рас па? 18 августа 2020, 14:32

Ақпан айында Оңтүстік Корея коронавирус жұқтырғандар саны бойынша Қытайдан кейін екінші орында тұрған. Ал қазіргі статистика бойынша 76-орынға
  • ПОДЕЛИТЬСЯ
  • Vkontakte
  • Facebook
  • Twitter
  • Одноклассники
  • Telegram
Новостью поделились: человек

© Reuters © Reuters

Ақпан айында Оңтүстік Корея коронавирус жұқтырғандар саны бойынша Қытайдан кейін екінші орында тұрған. Ал қазіргі статистика бойынша 76-орынға түскен. Бүгінде елде 15 мыңнан аса науқас анықталған. Алғашында коронавирус бәсеңдеп келе жатқан елде бүгінде вирустың жаппай тарауына әкеліп соғуы мүмкін жаңа ошақтар анықталған. Tengrinews.kz тілшісі Оңтүстік Кореядағы COVID-19-ға байланысты жағдайды баяндайды. 

20 қаңтарда Кореяда коронавирус расталған алғашқы науқас анықталған. Ол - Қытайдан келген 35 жастағы әйел. Үш күннен кейін COVID-19 Уханда жұмыс істеп, артынша респираторлық белгілер анықталғаннан кейін елге оралған 55 жастағы ер адамнан анықталған. 24 қаңтарда елде екі науқас анықталғаны туралы ресми түрде хабарланды.

Мамыр айына қарай Оңтүстік Корея коронавирус бәсеңдеп жатқан елдердің қатарында болды. Алайда 22 маусымда ауруларды бақылау және алдын алу орталығының басшысы Чон Ын Ген Сеул мен оның шеткі аймақтарында коронавирустың екінші толқыны басталғанын хабарлады.

"Алғашында коронавирустың екінші толқыны күзде не көктемде болады деп болжадық. Бірақ біздің болжам қате болып шықты. Біз адамдар бір-бірімен тығыз байланыста болғандықтан инфекцияның тарауы тоқтамайды деген тұжырымға келдік", - дейді орталық басшысы.

Ал 11 тамызда Оңтүстік Кореяда коронавирустың үш жаңа штамы анықталды. Елдегі ауруларды бақылау және алдын алу орталығының мәліметі бойынша, ғалымдар шетелден келген адамдардан коронавирус геномының үш жаңа мутацияланған тізбегін анықтаған. Яғни, жаңа жағдайлар Германияның GISAID мәліметтер базасында тіркелген 80 мың геномдық вирустық тізбектен біршама айырмашылығы бар болып шыққан. Гендік мутация вирустың бетіндегі ақуыздан анықталған. Шетелден келген үш адамның екеуі Пәкістаннан, біреуі Өзбекстаннан келген. Үшеуі де елге келе сала оқшауланған. Кореяда олармен байланыста ешкім болмаған.

© Reuters

Орталық директоры Чон Ен Кынның айтуынша, жаңа штамдардың жұғу деңгейі мен патогендігін анықтау үшін бірнеше тәжірибе жүргізу керек.

Жалпы тамыздың ортасында елде коронавирус жұқтыру күрт ұлғая бастаған. Шілденің соңында елде 100-ден аса адамның COVID-19 жұқтырғаны белгілі болды. Мысалы, 14 тамызда Оңтүстік Кореяда коронавирус инфекциясын жұқтырған 103 адам анықталған. Соңғы рет мұндай көрсеткіш 25 шілдеде (113 адам анықталған) тіркелген. Мамандар коронавирус жұқтырған науқастардың күрт ұлғаюы жергілікті шіркеулер мен сауда орталықтарында адам көп жиналуымен байланысты болуы мүмкін екенін айтқан.

Коронавирус пандемиясы кезінде ойын-сауық, сауда орталықтары жабылмаған. Тек ол жерге баратын адам саны әлдеқайда азайған. Жергілікті тұрғын, қазақстандық Диана Сағиева мұны корейлердің тәртіпке бағынатындығымен байланыстырған еді.

"Ақшалай да, заттай да көмек беріледі" - Кореяда тұратын қазақ елде COVID-19 қалай басылғанын айтты


© Reuters

17 тамызда Оңтүстік Корея билігі елдегі шіркеулердің бірінде коронавирустың жаңа ошағы анықталғанын хабарлады. COVID-19 ошағы Сеулдегі Sarang Jeil шіркеуінде анықталған. Діни мекемеде жалпы 300 адам коронавирус жұқтырып, жүздеген адам COVID-19-ды анықтайтын тесттен өтуден бас тартқан. Енді билік әлеуметтік қашықтық бойынша қосымша жоспар енгізуге мәжбүр болып отыр.

"Қазіргі жағдай коронавирустың жаппай тарауына әкеліп соғуы мүмкін", - деді ауруларды бақылау және алдын алу орталығының директоры Чон Ен Кын.

Орталық мәліметінше, жексенбі, 16 тамызда ел астанасында 197 жаңа жағдай анықталған. Нәтижесінде науқастардың саны 15,5 мыңнан асқан.

"Егер вирусты тоқтатып, бақылауға алмасақ, науқастардың саны күрт ұлғаяды, ол біздің медицина жүйемізге кері әсер етіп, экономикамызға айтарлықтай залал келтіреді", - дейді Чон.

Корейлік эпидемиологтар Сеул шіркеуіндегі коронавирус ошағы Тэгу қаласындағы жасырын христиан сектасындағы қайғылы жағдайды қайталауы мүмкін деп сескеніп отыр. Тэгу қаласындағы Щинчонджи шіркеуінің қызметкерлері коронавирусты анықтауға тест тапсырудан бас тартып, олар мыңдаған адамға жұқтырғандықтан ақпаннан бастап елдегі бүкіл шіркеу жабылған болатын. 

Еске салайық, Оңтүстік Кореяда коронавируc жұқтырған 15 761 адам анықталған. Оның ішінде, 13 934 адам аурудан айықса, жалпы 306 адам қайтыс болған. 



Join Telegram